Nawezaje kushinda dhambi

SOMO:- NAWEZAJE KUISHINDA DHAMBI
                   
                        YA

   TAMAA YA MWILI (NGONO) ?

[ Darasa la wavulana na mabinti ]

➖➖➖➖➖➖➖➖➖➖

Mstari muhimu wa kukumbuka:-

WAGALATIA 5:16-17:-"Basi nasema, ENENDENI KWA ROHO, WALA HAMTAZITIMIZA KAMWE TAMAA ZA MWILI. Kwa sababu mwili hutamani ukishindana na Roho, na Roho kushindana na mwili; kwa maana hizi zimepingana, hata hamwezi kufanya mnayotaka."

〰〰〰〰〰〰〰〰〰〰

Maadamu bado  tumeuvaa mwili huu, basi sio kwamba kutamani hakutakuwepo kabisa. Kunaweza kuwepo!  Lakini neno  limetupa siri ya kuzishinda hizo tamaa za mwili kwa kuenenda kwa Roho Mtakatifu.

Neno la Mungu limeatuambia hapo mtu anayeenenda kwa Roho hataweza ```"KAMWE"``` kuzitimiza tamaa za mwili wake. Kuenenda kwa Roho  ni kuishi maisha ya kutawaliwa na kuongozwa na Roho Mtakatifu.  Iko siri ya ajabu, uwezo na nguvu ya kuishi ndani ya Roho Mtakatifu kikamilifu. Ukiishi ndani ya Roho Mtakatifu kikamilifu hutaweza kamwe kuzitimiza tamaa zako za mwili labda ukatae tu mwenyewe kuenenda kwa Roho, yaani  umuasi huyo Roho aliye ndani yako [ISAYA 63:10; WAEFESO 4:30].

Mojawapo ya faida kubwa ya mtu kujazwa nguvu za Roho Mtakatifu tena na tena na akakubali kuongozwa na Roho Mtakatifu,  kumtii. Huyu Roho humzuia mtu asitende dhambi,  na hata kama kutakuwa na mitego ya kuwangusha mtu dhambini,  huyu Roho atamwonyesha huo mtego na kumpa mtu hekima, maarifa na nguvu/uwezo wa kuishinda hiyo  mitego  ya Ibilisi [ LUKA 24:49; MATENDO 1:8; ISAYA 11:2]. ```Hata kama kwa hila za shetani utawindwa kiasi gani uangushwe```.  Kwa mazingira kama hayo kama  mtu uliyeookoka uko vizuri sana na Roho Mtakatifu,  utasikia kabisa Roho anakwambia au kukuonyesha kitu: ```"Hapana!  Hapana! Usiende! Usiende!   Huo ni mtego. Jiepushe na huyo kaka au huyo dada,  usichukue hiyo pesa,  Zawadi.......... N.k."``` kuonywa huko na Roho Mtakatifu kutaambatana na kukoseshwa amani  moyoni juu ya mtu fulani au jambo fulani linaloendelea. Na ukiwa mwepesi  wa kumwelewa  Roho Mtakatifu  na kumtii kamwe hutaangushwa dhambini. Biblia inasema WAEBRANIA 3:12-13:-" Angalieni, ndugu zangu, usiwe katika mmoja wenu moyo mbovu wa kutokuamini, kwa kujitenga na Mungu aliye hai. Lakini mwonyane kila siku, maadamu iitwapo leo; ili mmoja wenu asifanywe mgumu kwa UDANGANYIFU WA DHAMBI".

Dhambi huwa inakuja na sura ya udanganyifu ili kumkamata mtu. Kwa nje inaoonekana nzuri, tamu, inapendeza lakini ndani imejaa sumu kali ya kukuua. Ni kama mtego wa ndoano katika kumkamata samaki. Ndivyo ulivyo  ```UDANGANYIFU WA DHAMBI```, naam, dhambi  ya zinaa.  Inapokuotea ! [MWANZO 4:7]

Na ukiona hilo jambo unaloonywa na Roho Mtakatifu kibinadamu linakushinda nguvu moyoni.  "Ni kama umishaanza kuvutwa kimapenzi na huyo mkaka au huyo mdada alivyo mrembo. Ameumbika  mithili  ya malaika! Duhu!  Moyo umeshindwa kujizuia jamani, uko hoi! Wowowo!  Tayari  umefall in love". Lakini unasikia kuna kuonywa na Roho Mtakatifu ndani yako kuhusu hayo. Unachopaswa kufanya ni kutenga muda wa kufunga na kuomba kwa siku kadhaa, kwanza ukiomba TOBA kwa kumpenda.  Na pili ukimwomba Roho Mtakatifu mwenyewe akuwezeshe na kukuongezea nguvu za kutoka katika hali hiyo. Jieleze  wazi  ulivyo  dhaifu kwake, umedata.  Mwombe Roho Mtakatifu nipeee nguvu, sitaki hali hii kabisa [WAEBRANIA 4:16; AYUBU 26:2; WAKOLOSAI  1:10-11].

Nakwambia ukimwendea Mungu  kwa maombi ya uchungu na  mzigo namna  hii, BWANA  YESU nataka  kuishi  maisha ya  kukupendeza wewe  lakini  mwili unanishinda mimi.  Roho Mtakatifu nisaidieeee!  Endelea kulia na kulalama mbele za BWANA namna hiyo.  Baada ya maombi ya namna hiyo ya kumainisha, ```UTAPOKEA  UWEZO WA AJABU wa kuishi bila kumtamani  mwanamke  yoyote kiuasherati``` mpaka wakati  wa ndoa. Wakati wengine dhambi ya ngono inawatesa na  kuwatumikisha, kwako wewe utaikanyaga  kanyaga dhambi hiyo chini ya miguu yako.

NAWEZAJE KUISHINDA DHAMBI YA TAMAA YA MWILI (NGONO)?

Biblia inasema enendeni kwa Roho wala hamtazitimiza kamwe tamaa za mwili [ WAGALATIA 5:16-17].

Ili uishinde dhambi ya tamaa za mwili.  Zingatia mambo yafuatayo:-

```(1) UWE UMEZALIWA MARA YA PILI KWA ROHO, yaani umeokoka.```

Kuokoka sio kubadili dini bali ni kubadilishwa maisha toka dhambini~gizani na kuishi katika nuru ya mapenzi ya Mungu. Lazima kuokoka kweli kuambatane na BADILIKO HALISI ndani ya maisha ya mtu [2WAKORINTHO  5:17].
Kuokoka  kunaamhatana  na  mtu  kupewa  uwezo  wa kufanyika  mtoto  wa  Mungu, UWEZO  huo ndio unaoitwa  uwezo  wa  kushinda  dhambi na kuishi kwa  kumfanana Kristo Yesu ndani  yako. Mtoto  wa  Mungu  ni  yule  anayefanana  na Mungu aliye  na sura  na  mfano  wake  [ YOHANA  1:12-13; 1YOHANA  3:1-3; WARUMI 8:8-10].

Yesu  Kristo alipokuwa  hapa  duniani. Alikuwa  ni  mwanadamu  kama  sisi. Alibalehe kama  tunavyobalehe  sisi, alipevuka  kama  tunavyopevuka  sisi. Lakini  pamoja  na  hayo  yote bado  Yesu hakuwahi  kumtamani  mwanamke yoyote  kiuasherati. Alijaribiwa  sawasawa  na sisi  katika  MAMBO  YOTE bila  kufanya  dhambi [WAEBRANIA  4:14-15]. Na  awaye yote  ambaye  amezaliwa  mara  ya  pili na  kuwa  mtoto  wa  Mungu, anapewa  uwezo  wa  kuwa  kama  Yesu. Tamaa  ya  uasherati  haiwezi  ikamsumbua sumbua, kiu  ya  ngono inazimishwa [WAGALATIA 5:24].

Na hata baada ya kuokoka. Hupaswi kuishia hapo tu. Lazima uendelee kuzingatia mambo mengine yafuatayo:-

```(2) EPUKA UKARIBU USIO NA MIPAKA KATI YAKO NA WAVULANA AU WASICHANA.```

Ukaribu uliopitiliza usio na mipaka uliopo kati yako na wavulana au  wasichana, mwisho wa siku lazima utajikuta umeangukia kwenye dhambi ya uzinzi na uasherati tu. Huwezi kwepa!
Wengi waliosimama vizuri kiroho wameanguka katika dhambi ya zinaa, kwa  sababu mojawapo ya kukosa ```nidhamu ya mipaka``` ya ukaribu wao na wasichana au wavulana (mazoea yaliyopitiliza ). Utaangushwa tu! Lazima  mvulana  ujitenge mbali  na  wasichana  na  msichana  ujitenge  mbali  na  wavulana [ MITHALI  6:23-29,32-33]. Simainishi  kwamha  msiongee au  msishirikiane kabisa, la!  Ila  jiwekee  ```NIDHAMU  YA  MIPAKA```, ukaribu uliopitiliza na usiokuwa  na  ulazima, na  mazoea mazoea   yasiyo  na  msingi. Block!

```(3) UNAPENDA KUSOMA NINI, KUSIKIA NINI NA KUONA NINI?```

Ukiwa kama kijana au hata mzee. Roho ya zinaa inapata mpenyo wa kumuingia mtu kupitia mambo makuu matatu ambayo  ni:- ```Kusoma, kusikia na kuona```.   Je unapendelea kusoma nini?  Kusikia nini na kuona nini?  Kama ni habari tu za mapenzi na ngono ndio unazijaza tu akilini mwako na moyoni mwako.  Unapendelea kutazama video/tamthilia/ za mapenzi, picha za uchi,  kusoma habari (magazeti) ya mapenzi ( mambo ya Sex sex tu). Hata kama umeokoka na unanena kwa lugha  Lazima ROHO YA ZINAA itakuingia tu na utaangushwa mweleka.

Ili uishinde tamaa ya mwili (ngono) . Lazima pia ujitawale au ujizuie na  kule kusoma kwako, kusikia kwako na kuona kwako. Wekeza sana zaidi  kupenda kusoma neno la Mungu,  kusikia nyimbo/mahubiri ya neno la Mungu na sio miziki hii  ya kidunia,  na kuona yale yaliyo mema yanakusogeza karibu zaidi na Mungu iwe kwenye picha/video au Internet na sio yale ya kidunia yanayokuingizia roho nyingine ya tamaa ndani  yako. EPUKA, YAKIMBIE! [ ZABURI 101:3; WAKOLOSAI  3:16; ZABURI 119:11].

```(4) UWE NA MAISHA YA KUFUNGA NA KUOMBA KWA MUDA MREFU!```

Kamwe huwezi kuishinda nguvu ya tamaa ya mwili, kama huna maisha ya kufunga na kuomba kwa muda mrefu. Tunakumbuka Yesu alisema ombeni msiingie majaribuni,  roho i radhi lakini mwili ni dhaifu [ MATHAYO  26:40-41]. MAOMBI YA KUFUNGA ya mara kwa mara na ya muda mrefu yanaudhoofisha na kuufunga mwili na kuipa NGUVU ROHO YAKO kuutawala mwili. Hivyo tamaa nyingi za mwili kwa mtu ambaye ni ```mwombaji sana mzamiaji```, tamaa za mwili kwake huwa hazimsumbui wala kumchukua tofauti na mtu ambaye sio ```mwombaji mzamiaji```.    Maombi ya muda mrefu hasa ya kufunga  yanakata kiu ya dhambi ndani ya mtu na kumpa nguvu za kiroho za kutembea  katika usafi na utakatifu.

```(5) JIHADHARI NA KUJIEPUSHA NA MARAFIKI WASIOMJUA MUNGU.```

Ukitaka kuishinda dhambi ya tamaa ya mwili lazima pia ujidhari na marafiki ulionao.  Biblia inasema tembea na wenye hekima na utakuwa na hekima bali Rafiki wa wapumbavu ataumia. Tena marafiki wabaya huharibu tabia njema  [MITHALI 13:20; 1WAKORINTHO 15:33 Kjv].

Ukiishi na kutembea na company ya marafiki wazinzi, wapenda ngono na anasa za dunia hii. Hawawazi  juu  ya Mungu hata  kidogo bali wao  wanawaza juu ya mambo  ya  kidunia tu.  Hata kama umeokoka, usipojiepusha nao, watakuambukiza hiyo tabia yao na taratibu kidogo kidogo  utaanza kuvutwa na kuwa kama wao, utafanana  nao. Upende au usipende watainyonya  nguvu  yako yote  ya kiroho na  kukumaliza [ HOSEA 7:8-9].

Ukiwa chuoni, shuleni, nyumbani na popote pale jitenge na company ya marafiki wasio na hofu ya Mungu ndani yao.  Nitajuaje kama hawana hofu ya Mungu?  Jibu:- Angalia wanaogopa kutenda dhambi hata iliyo ndogo. Kama ndani yao HAWAOGOPI KUTENDA DHAMBI. Basi jua kwamba hawa ni marafiki wasio na hofu ya Mungu. Jiepushe nao! [ ZABURI 1:1-3; ZABURI 26:2-6; MITHALI 1:10, 15-16; 22:24-25]. Bali unapaswa kukaa na kuzungukwa  na marafiki waliojaa  hofu ya Mungu ndani yao ambao wanazingatia  kuishi katika  usafi  na  utakatifu wa Mungu ndani yao katika  usemi, tabia  na  mwenendo  wao  wote [ MITHALI 16:6,17; 2TIMOTHEO 2 :19-22; 1PETRO 1:15-16].

Ni bora kuishi  bila  marafiki kabisa kuliko kuwa  na  marafiki wanaokupekeka na kukuvuta  Jehanamu ya moto kila siku.

```(6) ACHA MAVAZI YA MITEGO BALI VAA MAVAZI YA KUJISITIRI (KUJIHESHIMU).```

Huwezi kuwa wewe ni binti na umeokoka ukaishinda dhambi ya tamaa ya mwili kama huwa makini na jinsi yako unavyovaa . Unawavalia wanaume mavazi ya mitego halafu unakemea pepo la ukahaba lisikufuatilie. Wapi na wapi? Unatwanga maji kwenye kinu mpendwa. Ni sawa na mtu aliyetapakaa kinyesi mwili wote akijaribu kuwafukuza nzi wasimfukizie badala ya kujisafisha kwanza. Hao nzi hawatakuacha, watakufuata tu! 

Ndivyo ilivyo mtu anayekemea pepo kahaba lisimfuate fuate huku hataki kuacha kuvaa mavazi ya kikahaba ya kuwatega wanaume! Kemea ujuavyo Mapepo ya ukahaba hayawezi kukuacha mwanamke!

Biblia inasema katika  YEREMIA 31:22:-" Hata lini utatanga-tanga, Ee binti mwenye kuasi? Kwa maana BWANA ameumba jambo jipya duniani;  MWANAMKE ATAMLINDA MWANAUME"

Ni wajibu wa wanawake wanaomjua Mungu kuwalinda wanaume. Acheni kuvaa mavazi ya mitego! Epuka kuvaa suruali, vimini, vipedo, skenitaiti, mavazi ya kubana mwili na kuachia maungo yako wazi:- matiti, mapaja, kitovu na ```mapambo ya kidunia```:- mahereni, bangili  mikufu, kutinda  nyusi, wanja, lipostiki, rasta,  mawigi na  makorokoro  yote  ya urembo    n.k. Nyuma  ya  mapambo  yote  hayo  ya  kiduniani kwa  wanawake yameambatana  na  ```roho ya  ukahaba na  uchawi```. Ndiomaana unajiwa  na ndoto  za  kufanya  mapenzi usiku pengine  na  watu hata usiowajua [ MITHALI 7:10; KUMBUKUMBU 22:5; YEREMIA  4:30; 2WAFALME  9:22,30; ISAYA  3:16-24; 1PETRO  3:2-6]].
Kama wewe ni binti uliyeokoka acha  kujipamba  kidunia,  zingatia kuvaa mavazi mazuri ya kujisitiri,  ya kujiheshimu mbele za Mungu na hata mbele za wanadamu siku zote [ 1 TIMOTHEO 2:9-10].

```(7) USIJIINGIZE KATIKA MAHUSIANO YA KIMAPENZI KABLA YA WAKATI WA KUOA AU KUOLEWA```.

Biblia inatuonya juu ya jambo hilo ikisema katika
WIMBO ULIO BORA 2:7"-"Nawasihi, enyi binti za Yerusalemu, Kwa paa na kwa ayala wa porini, Msiyachochee mapenzi, wala kuyaamsha, Hata yatakapoona vema yenyewe."

Kila jambo lina wakati wake. Ni makosa kuthubutu kujiingiza katika mahusiano ya kimapenzi kabla ya wakati wako maalumu wa kutaka kuoa au kuolewa.
Kama wewe ni mwanafunzi, au uko chuoni au bado kwanza unatafuta zako maisha, hujafikia kipindi cha wakati wa kuamua sasa kutaka kuoa au kuolewa.  Usithubutu kutaka kujiingiza katika mahusiano ya kimapenzi na mtu yoyote. Vinginevyo utaanguka tu dhambini.

Kama katika mipangilio yako ya kimaisha hujafikia bado kipindi cha wakati wa kufanya maamuzi ya kutaka  ```SASA``` nioe au kuolewa. Usianzishe mahusiano ya kimapenzi na mtu kwa kisingizio cha kwamba TUTAKUJA KUOANA BAADAYE. Mnajidanganya ninyi shetani atakuja kuwajaribu na mtaanguka dhambini bila shaka. Na mnaweza msije hata kuoana.

Kipindi cha kuwa na mchumba lazima kiwe ndani ya wakati wako muafaka wa kutaka kuoa au kuolewa. Usije ukaweka mahusiano na mkaka au mdada fulani ambaye hajafikiria kuolewa leo wala kesho! Mwisho wa siku katika safari ndefu ya mahusiano yenu mtaanguka katika dhambi ya tamaa ya uasherati.

Hivyo basi ni afadhali usiyanuse wala kujihusisha na mapenzi kabisa mpaka pale utapofikia wakati wako wa kutaka kuoa au kuolewa!  Ndipo ufikirie kuwa na mahusiano. Nje na hapo, usithubutu!

Hiyo ndiyo siri ya ushindi kwa kijana anayetaka kuishinda dhambi ya tamaa ya mwili. Zingatia hayo mambo saba  kikamilifu, kaa katika hayo na yaishi hayo. UTASHINDA!

1 YOHANA 5:4:-"Kwa maana kila kitu kilichozaliwa na Mungu huushinda ulimwengu; na huku ndiko kushinda kuushindako ulimwengu, hiyo imani yetu."

Hili ndilo jibu langu kwa mabinti na vijana wanaoniuliza.
🌸🌸🌸🌸🌸🌸🌸🌸🌸🌸

Ukipenda  kuwasiliana nami  kwa ushauri  , maombezi  na  mafundisho zaidi ya masomo ya neno  la  Mungu. Karibu :-
0672870833

Share this: